Xəyalə Sevil : - Keçib getdi, nə fərqi,

Ədəbiyyat 13:25 / 25.07.2025 Baxış sayı: 798

 

Keçib getdi, nə fərqi,

Yaxşı da olsa, pis də.

O bir ayrı hissdəydi,

Mən də bir ayrı hissdə.

 

Ad da tapa bilmədim

Ürəyimin köçünə.

Qalsam, nə olacaqdı?

Olası deyil heç nə.

 

Bu gün yenə dilimdən

Adı, ah, necə düşdü!

Axşamın şər vaxtına

İçimdən gecə düşdü.

 

Ondan başqa çarəm yox,

Nə ondan başqa dərdim...

Eh, nə bilim, bəlkə də,

Çağırsaydı, gələrdim.