Şakir  Xanhüseyn : - ŞEİRLƏR

Ədəbiyyat 22:13 / 28.03.2023 Baxış sayı: 2772

***

...elə bil quşların səsi

bir-birinə dolaşa-dolaşa,

düyün düşə-düşə

səhər açılır...

***

...ən azından

özümü yaxşı izləyə bilirəm;

bir addımım belə

qaçmır gözümdən...

***

...bax, sən

ürəyinə nəsə ək ki,

ordan bir şey biçəsən...

***

Əvvəl-əvvəl

bir pəncərə açılır səhər,

sonra bir qapı,

sonra neçə-neçə göz

birər-birər...

Bir quşun səsi qədər

cəlbedici olmur heç nə,

cəzbedici olmur...

Bilmirəm ki,

bir sözümüz, ya işimiz

gündüzümüzü işıqlandırmağa yetəcəkmi...

***

Hər kəs durub çölündə,

heç kəs düşmür kilidinə--

bağlıdı səsinə,

sevincinə, ümidinə...

İnsanlıq sıxışmıştək

bir küncə, bir köşəyə,

qalıb qəm kövşəyə-kövşəyə...

***

...nə yerə sığırıq, nə göyə,

bir başımızın çarəsinə baxa bilmirik amma...

KÖÇ

Yır-yığış et, köçhaköçdü,

bir əl-ayaq elə, gör

apara biləcəyin nə var, zalım...

Köç yoludu ömür, bir sirr,

Hamı köç üstədi, bilsin;

elə sən də köç üstəsən,

gah ağ, gah qara qoç üstəsən...

Yerini rahla;

nə amanla, nə ahla,

təmiz bir ruhla

köçə hazır ol...

Köçün bu ucu, o ucu yox,

ac, ya da ki tox

həmişə köç üstə olduğunu bil,

ən dərində

üzdə olduğunu bil...