1

SALAM, ALA-BƏZƏK PENCƏKLİ KİŞİ

Gülər gözlərindən kədəri daşan,

Hər işə ərdəmli, ürəkli kişi,

Üzündə əbədi dərdi daşlaşan,

Salam, ala-bəzək pencəkli kişi...

Köynəyindəki bu ütülü şaxlıq,

Həm də ki parlaqlıq qalstukunda

Və cib dəsmalın da rəngarəng,

qəşəng,

Laklı ayaqqabın-- nə varmış bunda—

Nəzərdən qaçmayan bu bər-bəzəyin

Mənə çeşidini dərdlərinin də

Anladan kimidir, bilmək istəsən,

Qəmlə bəslənmisən elə bil ki sən...

Salam, ala-bəzək pencəkli kişi,

Düşüncəsi solğun, min bir gümanlı...

Parlaq, tünd qumaşdan köynəkli kişi,

Nədən gülməyin də ahlı—amanlı?!.

2

****

İlahi, bu dünyanı saxla bizdən uzaqda,

Hər gələn keçir başa ayağının tozuyla...

Kimisinə hər şeyin çoxunu verdin, sussun,

Kimisi də başını qarışdırsın azıyla...

Yedirilən acılar hansı mətbəxdə bişir?

İçilən göz yaşları dəmlənsə də, ağdır, ağ...

Neçə cığır-kəmərlə belini sıxmış qaya,

Baxıram yüzlərlədir, bəlkə minlərlə, bir dağ...

Göy qübbəsi sütunsuz, nə zamansa çökməzmi;

Hərə bir barmaq edir Tanrının işlərinə...

Süddən yanıq böyüdük; yer uşağı deyilik?

Süd gəlmir Yer-Ananın qurumuş döşlərinə!..

13.06.21

3

QAZİ

...çoxumuza addım atıb

necə yerimək öyrətdi

ayaqlarını Qarabağ savaşında qoyub gələn qazi...

daha çox izlər qoymuş

heç yürümədiyi dağlarda, düzlərdə,

ürəklərdə-

hər yerdə,

əzizlərini görəndə

heç nə olmamıştək gülən qazi...

həm də şəhid olmuş

yoldaşlarının həyatını yaşayır,

arzularının çin olmasına çalışır

min əllə, min ayaqla

ayaqlarını itirmiş qazi...

o ayaqlar ki,

ən keçilməz qayalıqlardan keçir indi də;

onlar üçün

dayanmaq yox, durmaq yox,

diz yerə vurmaq yox...

Ayaqlarının üstündə

mərd-mərdanə durmağı bacardı

vətənə qurban etdiyi ayaqlarıyla

bu qadir, yenilməz qazi

edərək özünə heyran bizi!

4

QARLI ŞEİR

Qarların altında qaldı evimiz,

Elə hey yay ola, o qar əriməz...

Qaldı sevincimiz qarların altda,

O sevinc yox olar, o qar əriməz...

Qar basıb görünmür, görünməz olub

İllər öncəsinə gedən yolları;

İsti yay günü də qalın qar örtüb

Xəyalımdan keçən bütün yolları...

Qar basıb yaylaqda ot yerimizi,

Ocaq yerimizi, od yerimizi;

O ocaq yeri ki pirə bərabər,

O ocaq yeri ki and yerimizdi...

Günəşdə qurula,

yu isti suda,

Ağaran saçının qarı əriməz...

Bəlkə sübuta da yox ehtiyacı,

Ağrının, acının qarı əriməz...

Ən günəşli günlər, ən odlu günlər

Qar altındadır.

Bir-birindən gözəl, ümidli günlər

Qar altındadır,

Qar altındadır...