Oxudum - yazdı Əbülfət  Mədətoğlu

Ədəbiyyat 10:31 / 23.05.2023 Baxış sayı: 1328

 

Düşünmə ki. ağ günümə güvənib

Duaları ağ üzünə oxudum...

Öz- özümü söykəyərək divara -

Günahları bax , üzünə oxudum...

 

Yazım nədi? - yaşadıqca çözüldü

Hər yaşama ilahi eçq özüldü!

Mənə necə, hara qədər dözüldü -

Daş üzünə, dağ üzünə oxudum...

 

Yarpaq yarpaq, çiçək çiçək puçurdan

Öz könlünü kəpənək tək uçurdan ...

Söküldüyün görəndən mən bu cür dan -

Ağac. həm də bağ üzünə oxudum...

 

Külək çırpan sünbülü, həm zəmini

Dəyirmanda gördüm - son da qəmini...

Anlamağa çalışdığım dəmini -

Qönçə, bir də tağ üzünə oxudum...

 

Fərəhlənən, qürrələnən bəndənin

Təklik kəsdi vüsalına bənd əlin!

Tay ömrümlə ödəyərək bədəlin -

Haqqın bunu , sağ üzünə oxudum!