Əbülfət Mədətoğlu : - TOXUNUM
Dondurduğun son duayam,
Nəfəsin dəymir, oxunum!..
Gizlətdiyin adım kimi -
Dil, dodağına toxunum!
Ruhum ola şimşək - çaxa,
Açıq qala sinə, yaxa...
Sən üzümə baxa, baxa -
Gül, dodağına toxunum!..
Sevgimi hər yana yayıb,
Məni qurbanlığın sayıb...
Çəkdiyimə demə " hayıf" -
Bil, dodağına toxunum!..
Qalmasa da başımda tel,
Hələ duyuq düşmədən el...
Başlamadan gözümdən sel -
Sil, dodağına toxunum!..
Günüm sənə günü gəlsin,
Gözlədiyin günü, gəlsin!
Talehimiz gülümsəsin -
Gül dodağına toxunum!..