Bəhanə var pənco-pənco vurmağa,

Dostlara həmdəm olmağın yeridi.

Haqqımız yox bir qıraqda durmağa,

Bir məclisdə cəm olmağın yeridi,

İçib- içib dəm olmağın yeridi..

Şərab neçə əhli halı tərpədir,

Gah həsrəti, gah vüsalı tərpədir,

İlk sevgidən qalan xalı tərpədir.

Ürəklərdə qəm olmağın yeridi.

İçib-İçib dəm olmağın yeridi.

Qara-qura fikirləri daşlayıb,

Yavaş-yavaş boğazları yaşlayıb,

Siftəsini bir az zildən başlıyıb,

Asta asta bəm olmağın yeridi..

İçib-İçib dəm olmağın yeridi.

Qoy desinlər biganələr nə deyir,

Əsas odu divanələr nə deyir,

Baxaq görək pərvanələr nə deyir,

Məqam bu an şəm olmağın yeridi,

İçib-İçib dəm olmağın yeridi.

Dədə ordan araq gətir, kabab ver,

Qoy bu gecə aşıb daşısın savab, ver,

Saqi mənim sualıma cavab ver,

Heç arağı kəm olmağın yeridi?

İçib-İçib dəm olmağın yeridi.

Süzün görək, bulaqların döşünnən,

Zəhləm gedir badələrin boşunnan,

Xatirələr qılınc çəkir, qoşunnan,

Gözümüzdə nəm olmağın yeridi..

İçib-İçib dəm olmağın yeridi