Bir şəhla gözlünün gözünü sevdim,

Bu dünya qəm-kədər gətirdi mənə.

Yenə könül verdim ayrılıqlara,

Ah, bu nə sevdadır- odlandım yenə.

Aşıq bir hava çal, öldüm mən, aşıq,

Buludlar ağlasın, dağlar ağlasın.

Bir qərib yolçuyam, geriyə yol yox,

Sevdiyim o gözəl qara bağlasın.

Yuxumu danısdım axar sulara,

Budağından düşdü bir qızıl alma.

Bu dünyanın vəfasına inandım,

Aldandım- peşiman olmadım amma...

Bu səhər Tanrıma dua elədim,

Gözdən, könüldən çəkilsin duman.

Qürbət axşamından köynək toxudum,

Əynimə dar gəldi, of, aman, aman...