Elnur Uğur Abdiyev : - O ağacı qız vaxtı kəsdilər,

Ədəbiyyat 08:40 / 27.04.2025 Baxış sayı: 783

O ağacı qız vaxtı kəsdilər,

Qoymadılar qadın olmağa,

Balta çaldılar qızlığına.

O ağacı düz vaxtı kəsdilər,

Qoymadılar göylərlə qucaqlaşa,

Qoymadılar çiçəklərini geyinə.

O ağacın içindən ucalmaq eşqi

Baltalandı yer- yerdən.

O ağacı kötük eləyənlərə,

Ağac kölgə salmadı o gündən.

O ağacı beləcə qətl elədilər,

Qatillər,

Əlləri ağacın qanına batdı.

Ağac yarpaq- yarpaq hönkürdü,

Ağac yarpaq- yarpaq tüpürdü,

Dibinə göz yaşlarını.

O yerə sonra nə qədər ağac əkdilər,

Bircəciyi tutmadı.