(Sevgilisini döyüşlərdə itirən bir qız havalanmışdı...)

Siz Allah, o qıza durmayın yaxın,

Siz nə bir göz qoyun, nə də bir baxın...

Siz Allah qıraqdan hərlənib gəlin,

Bir az yavaş-yavaş yellənib gəlin...

O qızın

Gözündən bir Araz sellənib gəlir,

Özü də keçənmir o üz-bu üzə!..

Qalıb iki suyun arasında o...

Bəlkə ilk eşqini, ilk sevgisini,

Gizləyib gözünün qarasında o...

Siz Allah, o qıza getməyin yaxın,

Ruhu uçub daha,

Qalan bədəndir...

Ümidinin yeddi qatına baxın,

Tanrı dərgahında

Duran bəndədir...

Görmürsününz gözü göylə oynayır,

Durub ulduzları bir-bir sanayır;

Axtarır özünün bəxt ulduzunu,

Sanaya-sanaya yorur özünü...

Siz Allah o qıza yaxın getməyin,

Onun ürəyinə yenə xal düşər.

Siz Allah o qıza yaxın getməyin,

Gedin qisas üçün,

Gedin döyüşə!

Siz Allah, o qıza yaxın getməyin,

Qıymayın ürpənə, nə də diksinə...

Göylərə sarıdır o qızın yönü.

Onun ilk eşqinə, ilk sevgisinə,

Məlhəmdir

Gözlənən QƏLƏBƏ günü!..

Siz Allah, o qıza yaxın getməyin!..

2016