Şakir Xanhüseyn : - AÇILMAQ

Ədəbiyyat 15:10 / 21.05.2025 Baxış sayı: 1587

 

bəzən

önündə yol açılır,

amma özün o yola açıla bilmirsən;

bax, yolun yolda qalır...

bir kitabı açırsan, nə fayda,

görürsən oxunmadı bir varaq da,

çünki hiss edirsən

sən açılmamısan o kitaba...

eləcə süfrəni açmazdan əvvəl

ürəyin açılmalı,

saçılmalı işığın o süfrəyə,

duza, çörəyə,

gör ha...

hətta

qazanının qapağından,

qapından,

qabından qabaq

özün açılmalısan bir üfüqsayaq,

özün,

ay canım-gözüm!