Şakir Xanhüseyn - BİR ANIN ŞEİRİ

Ədəbiyyat 08:31 / 22.09.2025 Baxış sayı: 1646

 

əlini bir uzatsana,

qələm, yerdəyəm, yerdə.

nədir canımdakı bu dərd,

ələm, yerdəyəm, yerdə...

 

nöqtə, vergüllər dağınıq,

elə fikirlərim də;

güclü küləklər əsirmiş

sanki fikirlərimdə...

 

var idimmi? yox olmuşam,

ey səssiz ağlayan şam...

yanıb yelə sovrulmuşam-

külüm, yerdəyəm, yerdə...

 

ağ dediyim qaradısa,

bax, zaman uğursuzdu;

qədəhi tərs tutdum, yenə

bəxt ona acı süzdü...

 

nə qədər tox gəzdimsə də,

ha dözdüm bezdimsə də.

məni qaldır ayaq üstə,

yolum, yerdəyəm, yerdə...