Bu elə dərddir ki, dərmanı yoxdur,

Hardadır loğmanım, a Sevda, Sevda.

Ürəyim yanğıdır, imanı yoxdur,

Görünmür dumanım, a Sevda, Sevda.

Nə ağır dərd oldu anam, oy, anam,

Oxlanam, oxlanam, qana boyanam,

Günüm də gecədir, necə oyanam,

Bitmədi amanım, a Sevda, Sevda.

Bağam xəzan vurmuş, barımdan iz yox,

Yoxum qaldı mənə, varımdan iz yox,

Qara torpaq oldu, yarımdan iz yox,

Yoxdu bir gümanım, a Sevda, Sevda.

Əllərim üşüyər, saçlarım ağlar,

Həsrətin əlindən ürəkdə dağlar.

Soruşan olarsa, Sevdan nə bağlar?

Qaralar sultanım, a Sevda, Sevda.

Başımdan dolandı nə qara yellər,

Apardı Saranı o qanlı sellər..

Gözlədim, gözlərəm, obalar, ellər,

Dönmədi Mehmanım, a Sevda, Sevda.

22.08.2025