Bağı dağılmış bağbanım,

sözdən sənə bar verərəm !

Yandırsınlar bağ-bağatı,

közdən sənə bar verərəm !

Xoşdan başqa yox niyətim,

su,havadı milliyətim !

Dost,tanışa bir sifətim,

üzdən sənə bar verərəm !

Təpələr də dağ oxşarı,

sıx qoynuna,yığ oxşarı !

Sinəsi dağ, sağ oxşarım-

düzdən sənə bar verərəm !

Al dünyanın,sat dünyanın

bozu,qıratı dünyanın !

Tanışdı zatı dünyanın,

izdən sənə bar verərəm !

Yalan olsa, at daşını...

özüm qurutdum yaşımı !

Əyilməyən bu başımı,

dizdən sənə bar verərəm !

Bağı dağılmış bağbanım,

Sözdən sənə bar verərəm !

Yandırsınlar bağ-bağatı,

Közdən sənə bar verərəm !