Xəyalə Sevil :- Və...

Ədəbiyyat 08:33 / 18.07.2025 Baxış sayı: 995

Və

Boşaltdım ürəyimin yükünü,

Yığışdırdım öz-özümə ərkimi.

Sonra keçdi hər şey,

Sonra unutdum,

Sonra xatırlayıb gülümsədim də.

Eh! "Məni zamana buraxma",- dedim,

Yüz dəfə, min dəfə dedim,

Dedim də.

Onda darıxmaqdı,

İndi xatirə.

Onda ürəkliydim,

İndi ağıllı.

Sən həmin adamsan,

Heç dəyişmədin-

Həmin oyunçusan, həmin cığallı.

İndi illərdən sonra

Bu yaşda, bu ağılda

Mən özüm dura-dura

Səni qınamağa üzüm yoxdu.

Yenə taleyin ayağına yazdım

Vəfasızlığını.

Özünü axtarma şeirlərimdə,

Mənim sənə deyiləsi

Bir kəlmə də sözüm yoxdu.