Xatirə Fərəcli.: -Elə çox bənzərimiz var ki dənizlə...

Ədəbiyyat 14:41 / 24.06.2025 Baxış sayı: 1519

Elə çox bənzərimiz var ki dənizlə

o da havalı, mən də,

dəlidir, dəlisovdur dəniz

sıxılır olduğu yerdən mənim kimi,

əl –qol atır,

uzanır sahilə,

çırpır özünü ora-bura.

Dərindir, bahiməlidir dəniz,

amansızdır,

bəzən içində basdırmağı var

içinə girənləri

boğub lazımsız əşya kimi

sahilə tullamağı var.

Ehtina etmir,

ona daş atanlara

kimin kimə daş atmağına qımışır.

Bəzən həlim, saf, məsum,

nə yükləsən götürən,

nələrin, nələrin üstünü örtüb

içinə çəkməyi var.

...Adaları

sinəsindəki dağlar

gözlərdən boy verən kədər kimi...

Elə çox bənzərimiz var ki, dənizlə...