Şakir Xanhüseyn : -O qədər sevgiyə yadırğamışam

Gəl isidim səni buz əllərimlə,
təndir istisində üşü iyulun...
O qədər sevgiyə yadırğamışam,
ilantək dolanır boynuma qolun...
Çoxdan solub getmiş güllər dərirsən,
ah çıxır üzünə çəksən dərindən...
Hisslərin elə bil çölə sıçrayır
dolmuş gözlərinin gilələrindən...
Keçmişin canlanır bir xatirəndə,
bayaq bir yerdəydik, indi ayrıyıq...
Görəsən, səmada hansı ulduzdan
gəlib tapdı bizi Yerdə ayrılıq?!.
İyul 2025