Sən əlli yaşında hələ uşaqsan,

Çoxdan ömrün-günün yarıdan keçib.

Hər beşdən üçüylə qanlı bıçaqsan

Səninki adamlıq sarıdan keçib...

Bir yastı xanım var bilir nər səni,

Çoxu yola verir birtəhər səni,

Qapıdan girmirsən--görərlər səni

Çapıb talayırsan barıdan keçib...

Sən törpü dəyməmiş dişli həvəsən,

Büllur ruhumuza düşən güvəsən,

Özün öz gözündə filsən, dəvəsən,

Ayıl , xırdalığın darıdan keçib!..

Bircə himə bənddir hirsin, acığın,

Qorxun yox ilandan sözün açığı.

Zəhər tuluğusan, kin dağarcığı,

Zəhərin əqrəbdən marıdan keçib!..

Daha qalan qalıb , ölən ağlanıb,

Taleyin yazısı getməz, dağlanıb...

Daha olan olub, qapı bağlanıb,

Səninki qapıdan, qarıdan keçib!...