İbrahim İLYASLI : - BOZQURD olmaq

Ədəbiyyat 22:30 / 24.05.2025 Baxış sayı: 1168

 

Ulartın uzaqdan gəlir,

Yaxınları viran QURDum!

Bizi keçəbölük etdi

Mərə kafir – tiran, QURDum!

 

Adına canavar dedi

Cana vara bilməyənlər.

Yurd uğrunda bircə qaşıq

Qana vara bilməyənlər.

 

Sultan etdiyin ərənlər

Yolunda tuzaq qurdular.

Balana yaxın çəkdilər,

Babandan uzaq qurdular.

 

Qurtuluş verdiyin kişi

Dalınca tazı teylədi.

Köksünə qurşun şığıdıb,

Qanına qəltan eylədi.

 

Cəmi dönüklər buluşdu,-

Yasaq oldu özyurd olmaq.

İndi ən zülüm oluşdu,

Yer üzündə Bozqurd olmaq!