Və sonra, uzaqda görünən ilğım,

Elə bil gün altda yol da əridi.

Sonra gözlərimi yollardan yığdım,

Sonra da izlərim yolda əridi.

Od saçan səhradır hər tərəf, ancaq-

Deyirəm bir budaq kölgəsi tapım.

Könlümün küncünə işıq salaraq

Qırılmış bir arzu qəlpəsi tapım.

Yoxdur, elə bil ki, boşluqdu hər yan,

Arzudan o yana yol da görünmür.

Burda ayağını saxlayır zaman,

Saat da işləmir, vaxt da sürünmür.

Nağıllar büsbütün vahimə, qorxu,

Adam nağılların sonuna gedə.

Allahın yerini kim bilir axı-

Öləndə allahın yanına gedə.

Ölüm də maraqsız gəlir duyana

Hayana gedəsən burdan, hayana?