Adilə Nəzər: -Bax aldığım nəfəsə,..

Ədəbiyyat 11:15 / 16.07.2025 Baxış sayı: 1322

  · 

***

Bax aldığım nəfəsə,

Gör necə ağırlaşıb.

Yoxluğunu çəkirəm

Sinəmə, yağırlaşıb.

 

İyul... gün lağımlanır,

Bir sən varsan yadımda.

Saz səsi yanğılanır

Sükut çökmüş odamda.

 

Ümidlər uzaqlaşıb

Ulduz, Aydı yaxında.

Xəyallar duman olur

Gecə aydınlığında.

 

Şəklin çıxır qarşıma

Gəl yat indi, gəl dincəl.

Susuram fəryadımı

Avazım gəldiyincə.

 

Qalır qələm götürüb

Kağız ilə danışmaq.

Səncə çətin olarmı

Yoxluğuna alışmaq?!

15.07.2025