XƏBƏR LENTİ
26 İyun 2022
25 İyun 2022
24 İyun 2022
23 İyun 2022



Soltan Əliyev : - Qəlblərdə yaşayacaq DOST
Elm 09:52 / 10.04.2022


 

Görkəmli azərbaycan alimi Hətəm Quliyevlə məni 50 illik yaxın dostluq və tanışlıq birləşdirirdi. Onu Bakıdan tanısam da, əsas ünsiyyətimiz Kiyev şəhəri ilə bağlı idi. O vaxtlar (1970-ci illərin sonu) mən həmin şəhərdə aspirant idim, o isə orada yaşayırdı. Tez-tez qaldığımız yataqxanaya, azərbaycanlı tələbə və stajorların  yanına gələrdi. İnanın ki, onun  hər gəlişi toy-bayram olardı. Yaşca bizlərdən böyük, həm də artıq  elmi dərəcəsi var idi. Ona görə də öz təcrübəsini bizlərlə həvəslə  bölüşərdi. Biz ona, bir növ ağsaqqal kimi baxırdıq  və onun  tövsiyyələri bizim üçün  çox  qiymətli idi.  Yataqxana şəraitində qurduğumuz sadə məclilərə onun iştirakı xüsusi rövnəq verərdi. Böyüklə böyük, kiçiklə kiçik idi...

Hətəm müəllim elmin bir çox sahələrində nəhəng alim idi. Beynəlxalq elm aləmində böyük nüfuz qazanmışdı. Öz elm istiqamətində çoxlu sayda tələbələr yetirmişdi. Onların arasında çoxsaylı elmlər doktorları, hətta AMEA-nın üzvü adı alanlar da var. O  tələbələrinə qarşı tələbkar, lakin olduqca qayğıkeş və səmimi idi.

Adətən insanlar uzaq səfərlərdə yoldaşlıq edəndə bir-birlərini daha yaxşı tanıyırlar. Hətəm müəllimlə çoxsaylı birgə səfərlərimiz olub. Bir dəfə Kiyevdən Bakıya gəlməyə hazırlaşırdıq. Qərara aldıq ki, bir kupedə 4 nəfər yaxın yoldaşlar olmaqla qatarla  səfər edək. 50 saatlıq yol sanki bir anda gəlib keçdi. Sonralar da Respublikamızın bir çox bölgələrinə (Lənkəran, Naxçıvan, Altıağac və s. ), eləcə də Dərbənd şəhərinə birgə səfərlərimiz  oldu..., bunlar yaddan çıxan deyil. Bir dəfə o və digər dostlarla birlikdə anadan olduğum Xanəgah (Culfa r.) kəndində olduq. Hətəm müəllim qədim yerlərə, Əlincə qalasına, Şeyx Nəiminin türbəsinə böyük maraqla baxdı, valehliyini gizlətmədi. Bu  xatirələrimə əlavə olunan şəkil də elə orada çəkilib. 

Onu da qeyd edimki, Hətəm  müəllimin musiqi duyumu yüksək idi. Maşında gedə-gedə maqnitafondan tanınmış xanəndələrin ifasında muğamları, təsnifləri səsləndirər, ifaçılar və ifa barədə elə şərhlər verərdi ki, sanki professional musiqiçi idi. Bununla  yanaşı o  futbolla da çox maraqlanardı,demək olar  ki , idmanın bu  növündən yaxşı  baş çıxarırdı.

Hətəm müəllim yay aylarını  Nabranda keçirər, bizləri də tez-tez oraya dəvət edərdi. İstirahət etdiyi sanatoriyada hamının sevimlisi idi. Nərd yarışları, məclislər təşkil edər, camaatı öz başına yığardı. Elə iş yerində də nahar fasilələri vaxtı imkan olduqca bir qrup dostlarla Akademiyanın bağında gəzər, mənalı söhbətlər edərdi.

Hətəm müəllim doğma Qarabağın azad olunmasına hədsiz sevinirdi. Əfsus ki, qələbədən sonra anadan olduğu Füzuli torpağına gedib o yerləri ziyarət etmək ona nəsib olmadı. Onun əziz xatirəsi biz dostların qəlbində əbədi yaşayacaq. Allah rəhmət eləsin.

 

Fizika-riyaziyyat elmləri doktoru, professor Soltan Əliyev