Tahir Rzayev, millət vəkili : “ İçtimai-siyasi həyatdakı yenilənmə qanunlarda da reallaşmalıdı"

HÜQUQ 15:45 / 25.11.2022 Baxış sayı: 449

Bu fikri  öz açıqlamasında   Milli Məclisin Komitə sədri Tahir Rzayev  vurğulayıb. Millət vəkili  qeyd edib  ki, “Azərbaycanın ictimai-siyasi həyatında baş verən köklü dəyişikliklər bütün sahələrdə olduğu kimi 30 il bundan əvvəl qəbul olunmuş “Siyasi partiyalar haqqında” qanunda dəyişikliklərin edilməsini də  zərurətə çevirib. Bu həm də ölkədə siyasi sistemin formalaşması, siyasi partiyaların mühüm problemlərin həllində fəal iştirak etməsi, öz mövqeyinə və gücünə arxalanması baxımından əhəmiyyətlidir. Çünki indiki bir vaxtda siyasi sistemin möhkəmləndirilməsi üçün güclü, xalqın mənafeyini düşünən, mövqeyini müdafiə edən siyasi təşkilatlara, partiyalara ehtiyac duyulur. Onlar dövlətin idarə olunmasında və hakimiyyətin formalaşmasında institutlardan sayılır”.

Müzakirə  mövzusu olan  məsələ ilə bağlı  Tahir Rzayev bildirib ki, partiyaların milli mövqelərdən çıxış etməsi və dövlətin mənafeləri uğrunda birləşməsi xalqın istəyi olmaqla bərabər, həm də onların ümumxalq etimadı qazanılması üçün önəmlidir: “Azərbaycan dövləti siyasi partiyaların milli maraqlar uğrunda həmrəyliyinə, demokratik prinsiplərə əməl edilməsinə və şəfaflığın təmin olunmasına böyük önəm verir. 44 günlük müharibə dövründə bu həmrəyliyin nümayiş etdirilməsi, siyasi partiyalarla dialoqların qurulması və YAP-ın təsis edilməsinin 30 illik yubileyi münasibətilə keçirilən tədbirə bütün siyasi partiyaların dəvət olunması bunun əyani nümunəsidir. Siyasi partiyaların ümumxalq mənafeyi naminə eyni mövqedən çıxış etmək, çətin anda birləşmək və birgə mübarizə aparmaq amalı yeni qanun layihəsində öz əksini tapıb və yaxşı haldır ki, bu hamılıqla müdafiə edilir. Qanun layihəsinin “Normativ hüquqi aktlar haqqında” Konstitusiya qanunun tələblərinə uyğun hazırlanması, onun geniş müzakirə edilməsi, bəzi müddəaların layihədən çıxarılması göstərir ki, o xalqın siyasi iradəsini ifadə edir, demokratik norma və prinsiplərə əsaslanır. Qanun layihəsi ölkədə siyasi mühitin canlanmasına və çoxpartiyalılıq üçün əsasların genişləndirilməsinə, siyasi partiyalar arasında səmərəli, sağlam əməkdaşlığa, faydalı dialoqa xidmət edir və gələcəkdə ölkədə siyasi mühitin daha da sağlamlaşacağına inam yaradır”.