Yavaş-yavaş dəyişir hadisələr,

xəbərlər,

rənglər,

səslər,

ovqat,

Günəşin şüaları,

əhatə dairəsi...

Azalır yaxınlar, çoxalır yadlar,

Dəyişir ünvanlar, silinir adlar...

Ömrün axşamı yaxınlaşdıqca

tündləşir dünyanın işığı,

qatılaşır qaralan qan kimi

üfüqdəki qürub buludları.

Soyuq nəfəsini hiss edirsən

boynunun ardında boz küləklərin...

Əvvəllər toy dəvətlərindən bezirdisə də

İndi təngə gəlir adam yas çağırışlarından.

Hər gün ucuzlaşır dəyəri,

Hər şey bahalaşdıqca düşür insanların qiyməti

Bir zamanların qayğısı

toya salmağa 50 manat idisə,

indi yasa yazılmağa

20 manatın dərdini çəkirik...

Oysa ki,

şadlıq evlərindən

tərpənməyə yer tapmadığımız şəhərdə

göbələk kimi artır mərasim evləri...

Əvvəl kabab iyinə umsunan pişiklər

halva dadına imrənir indi...

Artmadadır toyları azalan məmləkətin

hüzn xəbərlərinin sayı.

Şadlanmağa təzə səbəb yox,

Qəmlənməyə köhnə təpər.

Yaşayırıq hələ ki,

iki hiss arasında birtəhər...

Nə ölən kimi ölə bilirik,

nə yaşayan kimi yaşaya...

Gəlir xəbərlər qara-qara...

Dəyişir hər şey, dəyişir!

20.02.2026