Hər gün bir yarpaq açıram

Yerin üstünə kölgə salım deyə.

Hər gün Allaha ağız açıram,

Insanlıq yaşasın,

İnsan ölsə də, içindəki insanı diri tuta bilsin.

Hər gün özümə deyirəm,

Unutmağı bacarsın pislikləri.

Bilirəm, bilmədiklərimi

Gələcək öyrənəcək.

Mən mənə düşəni edə bilsəm,

Bir yarpaq boyu

Yaşıllaşdıra bilsəm bu payız fəslini,

Ümidlər gülər,

Arzular qaranlığı silər

Sevinci hicran dağına dağ çəkdirər.

Hər gün bir yarpaq açıram,

Küləklər əsəndə utanmasın,

Hər Günəş çıxanda unutmasın

Yaşıllıqlar göyərdir göyün üzünü deyə.

Hər gün yerdən göyə

Bir ağız şeir söyləyirəm,

Tanrım, sən məndəsən,

Mən özümü borcluyam bu mənliyə.