Əbülfət Mədətoğlu : - ÜZÜN GÜLSÜN...
Gün o gündü, vaxt o vaxtdı
Durna lələk salan vaxtdı...
Ürəyimin şair vaxtdı -
Üzün gülsün...üzün gülsün...
Bulud bir az əyilibdi
Budağına dəyilibdi...
Neçə min yol deyilibdi -
Üzün gülsün, üzün gülsün...
Bu sökülən dan yerinə,
Gözümdəki qan yerinə...
Can verirəm can yerinə -
Üzün gülsün, üzün gülsün...
Bax halıma, bax günümə
Ağ halıma, ağ günümə!..
Təbəssümlə yağ günümə -
Üzün gülsün, üzün gülsün...