XƏBƏR LENTİ
07 Dekabr 2021
06 Dekabr 2021
05 Dekabr 2021



Aqil ABBAS: KÖNLÜMDƏN XANKƏNDİNDƏ BORŞ YEMƏK KEÇİR
YAZARLAR 14:50 / 14.07.2021

Şuşaya hər səfərdən sonra ora gedənləri  sosial şəbəkələrdə və saytlarda gedə bilməyənlər topa tuturlar, xüsusilə də  jurnalistləri və ziyalıları. Və topa tutanlar da elə  jurnalistlər və ziyalılardı.

Növbəti topa tutulan ATV-nin  əməkdaşı Zaur Baxşəliyevdi.  Və uzun bir siyahı yazırlar ki, niyə filan şuşalılar (söhbət  şuşalı jurnalistlərdən və ziyalılardan gedir) dura-dura Zaur  Baxşəliyevi Şuşaya aparıblar.

Əvvəla, Zaur Baxşəliyev də Şuşada doğulub, şuşalıdı və bütün  Qarabağın ağrı-acısını da yaşayanlardan biridi. Bunu da verilişlərində həmişə izləmək olur. Yəni Şuşaya  getmək onun da haqqıdı.

Və təbii ki, Zaur Baxşəliyev kimi digər  şuşalı jurnalistlərin və ziyalıların da Şuşaya  getmək  haqqı var.

İkincisi, həmin jurnalistlərin  təmsil olunduğu media orqanlarının  rəhbərləri bu barədə Prezident Aparatına müraciət edibmi? Etməyiblərsə, şikayət etməyə haqları yoxdu. Ediblərsə, nə cavab alıblar?

Üçüncüsü, az qalıb. Şuşaya  çəkilən yol tezliklə bitəcək, ondan  sonra Şuşanı su yoluna döndərəcəyik.

Dördüncüsü, tezliklə Ağdam-Şuşa yolu da  açılacaq, Ağdamdan 20-25 dəqiqə sonra  Şuşadasan. Bu yol 37 kilometrdi.

Ağdamın Ağdam vaxtı yarış gedirdi – kim bu yolu daha tez gedər? Yadımdadır, rekord rəhmətlik  rejissor Aydın Dadaşovun qardaşı  Ayaz Dadaşova məxsus  idi: 18 dəqiqə.

O da yadımdadır ki, Qarabağın  böyük ziyalısı, Xankəndi Pedaqoji Universitetin dekanı rəhmətlik Süleyman Zeynalovun oğlu Rafiq Zeynalov bu rekordu  təzələmək istəyəndə maşını ilə dərəyə  yuvarlanmışdı  və Allahın  mözücəsi baş vermişdi. Daşaltı çayına gedib düşən  avtomobildən sağ-salamat  çıxmışdı, yalnız bir qolu qırılmışdı.

Darıxmayın, həmin yarışların  yenə  şahidi olacağıq.

Və dostlar, siz də  darıxmayın. Allah qoysa siz də tezliklə  nə vaxt ürəyiniz istədi Şuşaya gedə biləcəksiniz.

Ağdamlılar borş yemək istəyəndə Xankəndinə gedərdilər və ən yaxşı borşu da Avtovağzaldakı yeməkxanada verərdilər.

Və mənim də könlümdən İsa bulağından  su içməkdən çox Xankəndindəki Avtovağzalda borş yemək keçir.

Bəs sizin?


6612 oxunub

InvestAZ